Mark Zuckerberg ក្លាយជាមហាសេដ្ឋីមានជាងគេលំដាប់ទី៣ នៅលើពិភពលោក ដែលមានទ្រព្យសម្បត្តិរហូតដល់ ៨១,៦ ពាន់លានដុល្លារ

ទ្រព្យសម្បត្តិរបស់នាយកប្រតិបត្តិក្រុមហ៊ុនបណ្តាញសង្គមខ្នាតយក្ស Facebook គឺលោក Mark Zuckerberg បានឡើងខ្ពស់ផុតទ្រព្យសម្បត្តិរបស់លោកមហាសេដ្ឋី Warren Buffett និងបានជំរុញឲ្យលោក Mark Zuckerberg ក្លាយជាមហាសេដ្ឋីមានទ្រព្យច្រើនជាងគេលំដាប់ទី៣ នៅលើពិភពលោកវិញម្តង បើគិតត្រឹមថ្ងៃសុក្រ សប្តាហ៍មុន។ លោក Mark Zuckerberg បច្ចុប្បន្នមានទ្រព្យសម្បតិ្តចំនួន ៨១,៦ ពាន់លានដុល្លារ បន្ទាប់ពីទ្រព្យសម្បត្តិរបស់គាត់បានកើនឡើងចំនួន ៨,៨ ពាន់លានបន្ថែមទៀតនៅសប្តាហ៍នេះ។

ហើយបើគិតមកទល់នឹងពេលកំពូលមហាសេដ្ឋីទាំង៣របស់ពិភពលោកគឺមានលោក Jeff Bezos នាយកប្រតិបត្តិក្រុមហ៊ុន Amazon, លោក Bill Gates ស្ថាបនិកក្រុមហ៊ុន Microsoft និងលោក Mark Zuckerberg នាយកប្រតិបត្តិក្រុមហ៊ុនបណ្តាញសង្គមខ្នាតយក្ស Facebook ។ សូមបញ្ជាក់ជូនថា លោក Mark Zuckerberg ក៏បានក្លាយជាមហាសេដ្ឋីដែលមានវ័យក្មេងជាងគេ និងអាចរកប្រាក់បានលឿនជាងគេផងដែរ ​​​​​​ព្រោះបើគិតមកត្រឹមពេលនេះគាត់ទើបមានអាយុ ៣៤ ឆ្នាំ ប៉ុណ្ណោះ៕

អត្ថបទៈ​ Anny

ប្រភព៖ cnbc